Paano Kapag Naiwanan sa Gagawing Pagdagit ng Panginoong HESUS?

   Sinumang makakasaksi ng mga ganitong balita (malapit nang maganap), ay mas mainam pang hindi na lang lumitaw sa mundong ibabaw!

 

     Pinakanakakagimbal na balita sa buong mundo!

Alamin kung bakit- sa pamamagitan ng videong nasa ibaba. Panoorin kalakip ang seryosong panalangin!

Maranatha! Nawa'y dumating KA na 

Panginoong HESUS!

Mapanganib na Katuruan sa Mapanlinlang na Kapanahunan

   

  Pinagtibay ng Bibliya na habang papalapit ang pagbabalik ng Panginoong Hesus ay aalagwa ang matinding pandaraya sa iba't ibang anyo at larangan. Ang pinakatarget ng lider ng panloloko (diyablo) ay ang mga mananampalataya. (Mateo 24:24). Ang panlilinlang na ito ay sa pamamagitan ng mga mapanganib na katuruan mula sa mga bulaang mangangaral o tagapagturo. (Mateo15:9, 1Timoteo1:7, 1Timoteo4:1-2, 1Timoteo6:3, 2Timoteo4:3, Tito1:11 at 2Pedro2:1)

   Kamakailan lang, ay labis ang pagkabahala ko sa isang pagtuturo sa himpilan ng radyo na madalas pinakikinggan ng mga mananampalataya, ilang araw na tinalakay ng tagapagturo ang paksa na "Kapag ang sinuman ay tumanggap ng kaligtasan, mananatili na ito sa kanya at hindi na mawawala." (???!!!???). Sobrang delikado o mapanganib ang katuruang ito at wala itong konkretong suporta mula sa Bibliya. May 3 o 4 na talatang ginamit ang tagapagturo para sa kanyang argumento ngunit napakadaming katotohanan sa Bibliya ang hindi man lang niya isinaalang-alang (sinadya ba niya o talagang hindi niya alam?) Sana nagpahapyaw man lang siya sa mga sumusunod na talatang ito: Exodus 32:33, Awit69:28, Awit 51:11, Pahayag 3:5, Ezekiel 18:24-27, MATEO 24:13, FILIPOS 2:12, Hebreo 10:26-27, 2Pedro 2:20-22, Pahayag 3:16, Juan 8:11 at napakarami pang iba. Matamis sa pandinig ang argumento ng mangangaral na ito, ngunit ito ay angkop lang sa ikalalakas ng mga nanghihina o nag-aalinlangan sa pag-ibig at pagliligtas ng Diyos. Tunay nga na nakakapagpalakas ang katotohanang walang makakapaghiwalay sa pag-ibig ng Diyos at walang makakaagaw sa atin sa kamay ng Diyos, ngunit ang talatang ito ay hindi batayan na hindi mawawala ang kaligtasan. Bakit? Gawin nating ilustrasyon na ang pag-ibig ng Diyos at palad Niya ay isang entablado. Hangga't nagpapasya ang sinuman na manatili sa entablado andun ang kaligtasan, kahit ano mang pwersa talagang hindi mananaig basta't nasa entablado siya. E paano kung yung may katawan ay nagpasyang umalis sa entablado (palad/pag-ibig ng Dios)? Mula sa pag-ibig ng Diyos ay lumipat sa pag-ibig sa sanlibutan? Katulad ng nangyari kay Demas (2Tim.4:10). Ligtas pa ba 'yun? Yung isa pa niyang argumento na ang kaligtasan ay batay lang sa gawa ng Diyos at ang lahat ay ganap na sa perspektibo ng Diyos ay lubhang masalimoot. Kung ito ay literal na tatanggapin, ay pwedeng isipin na lahat ng tao na nabuhay ay pawang sa langit o kaligtasan ang hantungan!(???) Wala nang parurusahan sa impiyerno!? Sinumang nakapakinig ng delikadong aral na ito (Di raw nawawala ang kaligtasan) na nasa kalagayang "hilaw" pa o naglalaro-laro pa lang sa pananampalataya ay mapapangiti. Yung mga dumadalo sa pananambahan (lalo na sa mga megachurches) na humaling pa rin sa panonood ng sine, telebisyon, internet, facebook, pornograpiya, alak, sigarilyo, kalaswaan, kabaklaan, gadgets, tsismis, paninira, pangungutya, inggit, hinanakit, kayabangan, materyalismo, kaplastikan, kasinungalingan,  at marami pang iba ay lalo pang bubuwelo at aalagwa! Ang mga ganitong bulaang katuruan ang dahilan kung bakit maraming nagsasabing mananampalataya ang lumalakad pa rin sa maluwang na daan! Kung pakasusuriin isa man sa mga sumusunod: Exodus 32:33, Awit69:28, Awit 51:11, Pahayag 3:5, Ezekiel 18:24-27, MATEO 24:13, FILIPOS 2:12, Hebreo 10:26-27, 2Pedro 2:20-22, Pahayag 3:16, Juan 8:11, ang kaligtasan, kapag hindi pinahalagahan ay tiyak na mawawala, ito nga ang puntirya ng diyablo, kapag nawala ang pananampalataya, laglag din kaligtasan. Ipinauna ng 1Timoteo 4:1, maraming tatalikod sa pananampalataya sa mga huling araw. Ligtas pa ba yung mga tumalikod? Bakit nga ba ang Panginoong Hesus ay paulit-ulit sa pagpapaala-ala sa Kanyang mga tagasunod na mag-abang at maghanda sa nalalapit Niyang pagbabalik? Wala bang kinalaman sa paghahanda ang pagtitiyak na taglay ninuman ang kaligtasan? Kung inaakala ninuman na lagi siyang ligtas, interesado pa kaya siya sa panawagan ng 1 Pedro 1:16 at I Juan 3:3? Ito ang aking paninindigan at alam kong sinasang-ayonan ako ng Banal na Espiritu: ang sinumang TOTOONG mananampalataya ay patuloy na nagpapasya hanggang sa kahuli-hulihang sandali niya sa mundong ito. Patuloy siyang nagpapasyang tanggihan ang kasalanan at sanlibutan. Patuloy siyang nagpapasyang sundin ang kalooban ng Diyos! Determinado siyang magpakabanal at magpakadalisay sa pag-aabang sa Kanyang Pinakamamahal. Patuloy siyang nagpapasyang pakaingatan ang KAPAKINABANGAN ng krus. PATULOY SIYANG NAGPAPASYANG PAKAIBIGIN AT PAGTAPATAN ANG PANGINOONG HESU-KRISTO!

  Talagang sa mabiyayang kapamaraanan lang ng Diyos kung bakit mapupunta ng langit ang sinuman- ngunit sa panig ng tao, ang pagpasok dito  ay isa pa ring PAGPAPASYA!

Ang mananatiling tapat

hanggang wakas

ang siyang maliligtas!

(Mateo24:13)

Ang Mga Maiiwan at ang Pelikulang Left Behind

   Isang magandang layunin at kapakinabangan ang agad kung nakita sa pelikulang ito na ipinalabas sa sekular na sinehan sa buong mundo: ang bigyang ideya ang lahat ng tao na talagang magaganap hiwaga na inihayag ng Mateo 24:40, 1Tesalonica 4:15-18 at ang 1 Corinto 15:51-52. Sa isang kisapmata maglalaho ang mga matutuwid na tagasunod ng Diyos at mga batang walang-malay sa kasalanan. Hindi maipagkakaila na may alam sa Biblia ang mga gumawa ng pelikula. Kahit papano ay naipahiwatig na kaya nawala ang mga tao ay dahil maka-Diyos sila, yung isang piloto nga ay may nakasulat pa na Juan 3:16 ang kanyang relo na siyang dahilan kung bakit napasama siya sa dinala sa langit sapagkat napakinabangan niya ang Juan 3:16. At may katuwiran naman na maiwan yung pangunahing tauhan si Nicolas Cage, sa papel bilang piloto, sapagkat binabalewala niya ang paalalang biblikal ng kayang asawa at meron siyang maruming pagnanasa sa isang stewardess. Walang direktang layuning mag-ebanghelyo ang pelikula, ang Biblikal na katotohanan ay parang sahog o sangkap lang sa kuwento. Mas binigyang tampok pa nga kung paanong ligtas na mailapag ang eroplano kesa sa kumbinsihin ang mga manonood na tumalikod sa pagkakasala. Hindi ko maala-alang binanggit ang pangalan ng Panginoong Hesus! Ni hindi nabanggit na kaya nawala ang mga kristiyano ay dahil sinundo ng Panginoong Hesus sa Kanyang muling (palihim)pagbabalik. Hindi ko nagustuhan ang eksenang ibinalibag ang Bibliya. Medyo maayos naman ang mga special effects, naipakita din kahit papano na talagang malaking trahedya ang pagkawala ng mga banal at inosente. Mga nagsasalpukang mga sasakyan at eroplano. Kung maituturing na ito ay isang kristiyanong pelikula? Ang masasabi ko ay hindi. Ngunit mas matino naman ito kung ikukumpara sa mga kasabay nitong pelikula. Sayang at hindi man lang nabigyan ng diin na dapat ay tiyakin ninuman na taglay nila ang totoong HESUS (may kaugnayan at totoong nakipag-isa) upang mapasama sa mga kukunin Niya. May pagsalungat din ito sa pangako ng Diyos sa Gawa 16:31, Ang sinumang sumampalataya sa Panginoong Hesus ay maliligtas, siya at ang kanyang sambahayan. Yung isang mananampalatayang karakter ay kinuha kasama ng kanyang anak pero naiwan naman ang 2 miyembro ng kanyang pamilya. Mas mainam sana kung kumpleto sila. Isa pang panganib ng pelikula: may pahiwatig ito na kahit naiwan sila, ay posible pa ring mapunta ng langit. Walang matibay na suporta ito sa Bibliya. Yung mga napagsarhan sa Mateo 25:12 ay talagang hindi na nabigyan ng ikalawang tsansa. Pwede pa bang balikan ang isinuka na?(Pahayag 3:16). Nasa mapanganib na kalagayan ang sinumang umaasa na maliligtas pa rin sakaling hindi sila mapasama sa paglaho ng mga banal.

   Ang pagkakataong maging handa ay ngayon na, ang mga nalalabing araw ay pagkakataong ibinibigay ng Diyos upang marapatin natin na mapasama sa mga susunduin ng Panginoong HESUS! Ang pelikula ay natapos naman sa talatang Marcos 13:32, wala ngang nakakaalam kung anong araw o oras magaganap, pero mas maganda kung nabigyan ng diin na talagang dapat MAGHANDA AT TALAGANG NAPAKALAPIT NANG BUMALIK NG PANGINOONG HESUS AT PAKATIYAKIN NA SIYA NA TALAGA ANG LAHAT-LAHAT SA ATIN!

Ang Paghihiwalay ng Matatalino sa mga Mangmang

    Noon pa mang bago-bago pa lang naitatag ang mga unang kalipunan ng mga mananampalataya, nagkakasama-sama na ang mga totoong kristiyano at mga peke. NATUKLASAN ito nina Pablo, Juan, Judas at sila ay naperwisyo ng mga pekeng "kapatiran". (2Corinto 11:26, 3Juan 10 at Judas 4).

   Ang katotohanang ito ay tinalakay mismo ng Panginoong Hesus sa isang talinhaga patungkol sa sama-samang pagtubo ng trigo (totoong kristiyano) at damo (mga peke). Pansamantalang hinayaan muna ng Diyos na magkakasama ang mga damo at trigo (mga totoo at peke). Isang dahilan ang nakita ko dito. Ang ikapu ng peke ay mapapakinabangan ng isang totoo at tapat na lingkod ng Diyos. Sa panahon ni Elijah, ginamit ng Diyos ang uwak upang siya ay mapagpala. Sa panahon ngayon, kaya kahalubilo ng mga totoo ang mga peke upang magsilbing mga uwak kahit madalas ang mga "uwak" na ito ay naghahatid ng kaguluhan at impluwensiya ng kamunduhan sa mga matitinong mananampalataya. Ngunit may takdang panahon na talagang maghihiwalay ang landas ng mga totoo at peke. At sa aking pakiwari, habang papalapit nang papalapit ang pagbabalik ng Panginoong Hesus ang paghihiwalay na ito ay nagagaganap na ngayon. Kung pagbubulay-bulayan ang talinhaga ng 10 dalaga sa Mateo 25, makikita dito ang dahilan ng paghihiwalay ng matatalino sa mga mangmang. Ang limang mangmang ay hindi mapalagay kungsaan-saan pa sila pumupunta, naghahanap ng kapunuan sa maraming pagkukulang. 

     Sa panahong ito, ang katulad nila ay mga "kristiyanong paro-paro". Palipa-lipat at kung saan-saan dumadapo. Naghahanap ng kalakasan at kasiyahan kung saan-saan at kung kani-kanino. "Sige doon tayo, sikat, magaling mahusay ang pastor dun, hindi ka aantukin, ang galing-galing magpatawa! Teka dun na lang malaki ang kongregasyon nila, glamoroso, mayaman at naka-aircon pa. Huwag diyan pangit mga manganganta diyan at hindi kumpleto ang instrumento kaya pangit ang tugtugan, walang kabuhay-buhay! Dun na lang sa kabila, laging may natutumba, nagbabagsakan dun at hinihimatay kapag madantayan ng pastor!"

   Naalala ko tuloy ang isang pastor na alam kung nasa piling na ng Panginoon. Bago siya namatay ay naghayag siya ng kalungkutan na ang mga minamahal niyang miyembro ay halos naglipatan lahat sa isang ministeryo na ginaganap sa bagong gawang shopping mall. Ang pastor na ito ay sobrang mapagbigay sa kanyang mga nasasakupan. Ang konting kita niya sa munting panaderya niya ay halos mapunta lang sa pantulong sa mga miyembro at ang mga tinapay ay libreng tinatanggap ng mga kapatiran ngunit sa kabila nito ay basta na lang siyang iniwan ng mga dati niyang pinagmamalasakitan. Tunay ngang nakakasakit ng kalooban ang mga taong walang utang na loob, madami nito ngayon ayon sa 2 Timoteo 3:2. Inaliw ko siya sa pamamagitan ng 1 Juan 2:19. Sa kabila nito lalong lumala ang sakit niya sa puso at umuwi na nga siya sa Panginoon. Ewan ko kung umabot sa kamalayan ng pastor na ang Diyos mismo ang nag-aalis at ang Diyos ang naglalagay. Seryosong mangangaral ng kabanalan ang nabanggit kong pastor. At ang pekeng tagadalo ay hindi talaga matutuwa kahit busugin pa siya ng literal na tinapay ng pastor kaya't hahanap at hahanap siya ng mangangaral na kikiliti sa kanyang pandinig (2 Timoteo 4:3) at kadalasang natatagpuan ito sa mga malalaki, mararangya at maiingay na kalipunan ng mga "mananambahan"! 

  Sino ba ang mga pekeng ito? Sila ay yaong nagtataglay ng IBANG "hesus" (2 Corinto 11:4) at sila din ang tinutukoy ni Pablo na mga kaaway ng krus ni Kristo at ang mga dinidiyos ay ang hilig ng kanilang mga katawan! (Filipos3:18-19). Ang mga pekeng ito ay hindi pa talaga ganap na nakaranas at nakaunawa ng tunay na kahulugan ng pag-ibig at katuwiran.(1 Juan 3:10)

   May inihayag sa akin ang Banal na Espiritu, kung bakit ihihiwalay Niya ang mga totoo sa mga peke. Sa panahon ngayon ang mga peke ay mahilig sa "ecunumical" pagsasama ng ibat ibang relihiyon. (Nasa agenda ito ng anti-kristo) Samasama silang magdarasal kahit iba-iba ang diyos nila. Ngunit hindi ito katanggap-tanggap sa TOTOONG DIYOS! Iipunin NIYA ang mga totoo upang maganap ang Mateo 18:18-20. Sa pagtitipon ng mga totoong kristiyano, napagtitibay ang presensiya ng TOTOONG DIYOS! Magiging mabisa't makapangyarihan ang kanilang pananalangin. Isang napakadakilang pananalangin ang gagawin ng mga totoong kristiyano sa mga huling panahong ito at tiyak na tiyak hindi sila bibiguin ng Diyos! Ano ang ipapanalangin sa pagtitipon ng mga totoong mananampalataya? Eto yun-

             "O Panginoong HESUS, Sunduin Mo na kami! 

                     Dumating Ka na, MARANATHA!"

  

Kapinsalaan sa mga Hindi Nag-aabang Part3

Kapinsalaan Sa Mga Hindi Nag-aabang

   Iba't ibang uri na rin ng mga "mananampalataya" ang mga nakadaupang-palad ko at hindi ko maiwasang magkaroon ng pag-oobserba. Hindi sa pagiging mapanuri o mapanghusga kinakapa ko lang naman sa sinumang nagsasabing "kristiyano" kung pareho din ba ang aming konbiksyon/pasanin o nararamdaman mula sa Espiritu ng Diyos. Ito ay ayon na rin sa diwa ng 1Juan 4:1. Isang malungkot na katotohanan ang napagtanto ko, mangilan-ngilan lang ang nasusumpungan kong kasang-ayon ko sa mahalagang biblikal na aspeto ng pagbabalik ng Panginoong Hesus. Karamihan ay matabang sa nalalapit na pagbabalik ng Panginoon. At dahil hindi sila gaanong interesado, hindi rin makapa sa kanila ang pananabik sa pagbabalik ng Tagapagligtas kaya nga hindi talaga sila nag-aabang. Ang inaabangan nila ay mga pagpapalang materyal, pinansiyal at mga makamundong kapakinabangan.

   Ito pa ang napuna ko sa mga hindi nag-aabang sa pagbabalik ni Lord, wala silang pasanin sa espirituwal na kapakanan ng kanilang mga mahal sa buhay. Kahit napakalayo sa Diyos, hindi interesado sa Bibliya at maraming hayag na kalokohang ginagawa ay ok lang sa kanila. Samantalang ang isang kapatid na laging bukambibig ang pagbabalik ni Hesus ay walang tigil sa pagpapaalala sa mga anak na nahuhumaling sa mga gadget at patuloy na nagsusumamo sa Diyos na mapalaya sa pagkahumaling ang kanyang mga mahal sa buhay at lubos na magsuko ng buhay sa Diyos. Hindi ako maaaaring magkamali dito, hindi partikular sa kabanalan at katwiran ng Diyos ang sinumang matabang sa pagbabalik ni Hesus. Dalang-dala sila o aliw na aliw sa malakas na agos ng mundo. Ang linaw ng sinabi sa 1 Juan 2:15, "Wala ang pag-ibig ng Diyos sa sinumang maibigin sa sanlibutan!". Paulit-ulit kong nababanggit na ang sinumang hindi interesado sa pagbabalik ni Hesus ay hindi talaga totoong umiibig sa Kanya. Ito pa ang natuklasan ko, maraming kunwari mananampalataya ngunit hindi naman talaga nakabatay kay Hesus ang kanilang kasiyahan at kasiglahan! Nakasandal sila sa galing at popularidad ng kanilang mga lider o mangangaral. Ang kasiyahan nila ay nakabatay sa ingay at laki ng kanilang kongregasyon, sa lamig ng aircon at karangyaan nito. Pagnagkaganun, anong napakatinding kapinsalaan ang sasapitin ng "mananampalatayang" katulad nito? Napakasaklap! Sasapitin nila ang sinabi ng Panginoong Hesus sa Pahayag 3:16! Seryoso ang Panginoon sa Kanyang banta sa mga maligamgam- "ISUSUKA KITA!" at ang sinabi sa 5 dalagang hangal na nagsusumamong sila ay pagbuksan ngunit ang wika ng Panginoon ay- "HINDI KO KAYO NAKIKILALA!" Ganito ang kalagayan ng mga naiwan at hindi nakasama sa pagdagit ng Panginoong Hesus sa mga tunay Niyang pinaging-banal!
  Meron akong nalamang aral at hindi ako sang-ayon dito. Kung sakali daw na hindi mapasama sa rapture ay ok lang. meron pa naman daw susunod na "batch". Pwede pa naman daw maligtas basta huwag lang magpatatak ng 666 sa antikristo sa halip ay magpapugot na lang ng ulo. Delikado ang katuruang ito. Para sa akin, kung talagang totoo ka, hindi ka isusuka. At kung isinuka na, ay hindi na talaga muling tatanggapin pa, e, isinuka na nga! Ang alam kung may tsansang maligtas kung magpapapugot ng ulo ay ang mga Hudyo na lamang.
  Kilalang-kilala ng Panginoon kung sino ang talagang Kanya... nagmamahal ng lubos... nagpapakadalisay at buong pananabik na nag-aabang sa ipinangakong pagbabalik ng Hari ng mga hari! Maranatha, dumating ka na nawa Panginoong Hesus!

Gaano na tayo Kalapit sa Pugutan ng Ulo?

     Sa loob ng 7 taong walang kapantay na kapighatian ay maghahari ang Antikristo. Lahat ng nabubuhay sa daigdig ay sapilitang pasasambahin sa kanya sa pamamgitan ng pagtanggap ng kanyang tatak na 666. Lahat ay tiyak na magpapatatak para makabili ng pantawid gutom maliban sa isang uri ng mga tao, ang mga Hudyo! sapagkat sa mga panahong yun, dun lang nila mauunawaan na ang kanilang Messiah ay yaong ipinako nila sa krus, hindi itong sikat na personalidad (antikristo) na inasahang bayani ng lahat ng lahi. At sa kanilang pagtangging magpatatak, sila ay PUPUGUTAN NG ULO! (Pahayag 13:15 at Pahayag 20:4)

     Sino ang mga mamumugot na ito? Matagal pa ba bago mangyari ito? Ano ba ang laman ng mga world news ngayon? sa mga internet? Di ba may mga panatikong muslim ngayon na hayagang namumugot ng ulo? Ito ay ang mga ISIS ng Syria at Iraq. Alam nyo ba kung ano ang pinakalayunin ng kanilang pamumugot ngayon? Ito ay ang marubdob na pagtataguyod nila ng relihiyong Islam, hinihikayat lahat ng muslim na ikonbert ang lahat ng tao sa Islam at kung tututol ay dapat pugutan ng ulo! Ang ganitong dedikasyon ang gagamitin ng paparating na antikristo na mayroong lihim na layunin na pag-isahin ang lahat ng relihiyon upang tanggapin siya bilang diyos ng lahat kasama na ng mga muslim. Sa katusuhan ng antikristo, makukunbinsi rin niya ang mga panatikong mamumugot-ulo! Nakahanda na ang antikristo, nakahanda na rin ang kanyang makinarya upang pugutan ng ulo ang mga Hudyo na hindi tatatanggap ng kayang tatak- ang 666!
Mga kapatid napakalapit na....
   Bago lumitaw ang antikristo, palihim munang darating ang TOTOONG KRISTO upang sunduin ang mga totoong tinubos ng Kanyang banal na dugo!

Pagpula ng Buwan sa taong 2014-2015

Bakit Pambihira ang Pagpula ng Buwan
sa Taong 2014-2015?

   Naitala ng mga batikang astronomeyo at siyentipiko ng NASA (National Aeronautical Space Administration) ang mga kagananapan sa kalawakan maging 3 libong taon pa ang nakalipas lalo na ang mga penomenon patungkol sa mga bituin, araw at buwan. Lalong-lalo na sa bihirang nangyayari ang pagpupula ng buwan at ang pagdidilim ng araw. Ito ang kamangha-manghang natuklasan ng mga Bible scholar at mga Henyong Hudyo: kapag nagaganap ito ayon sa pagkakatala ng NASA ay mayroong mahalagang kaganapan sa daigdig lalo't higit sa mismong bayan ng Diyos! Nakatala sa Bibliya, bago lumaya mula sa Egipto ang bayang Israel, nagkaroon ng malawakang kadiliman dahil nawala ang liwanag ng araw. Habang nakabayubay sa krus ang Panginoon muling nawalan ng liwanag ang araw! (Marcos 15:33) At marami pang pangunahing pangyayari sa Israel na ito ay sinabayan ng pagpupula ng buwan bagamat ito ay nalingid sa mga hudyo nandito ang ilan sa mga ito:

   Ngunit ito ang pinakapambihira sa lahat ay ang kasalukuyang nagaganap ngayon ang 4 na pagpupula ng buwan (tinatawag ng mga siyentipiko na Tetrad) sa loob lamang ng ilang buwan sa taong ito hanggang 2015. Kamakailan Oct.8 naganap ang ikalawang pagpula at yung una ay noong Abril 15, ang 2 huling pagpupula ay sa Abril 4, 2015 at September 28, 2015. Naalarma ang ilang mga henyong biblikal maging ang mga kristiyanong Hudyo sapagkat hindi lang na napakaikling pagitan ng pagpupula nito- ITO AY EKSAKTONG TUMAPAT PA SA 2 MAHALAGANG KAPISTAHAN NG MGA HUDYO NA NGAYON LANG MANGYAYARI, IDAGDAG PA NA SA PAGITAN NITO AY MAY MAGAGANAP NA PAGDILIM NG ARAW! Sinasabi rin ng NASA na ang ganitong kaganapan ay pinakahuli na sa siglong ito at kung mauulit pa ay daang taon na ang palilipasin.

 

 
   Isang katotohanan ang lalong nakatawag sa aking atensiyon ay ang sinabi sa Joel 2:31 " MAGDIDILIM ANG ARAW AT ANG BUWAN AY PUPULANG ANIMO'Y DUGO BAGO DUMATING ANG NAKAKATAKOT NA ARAW NI YAHWEH!" Ang nakakatakot na araw na iyon ay walang iba kundi ang 7 taong walang katulad na kapighatian na tinutukoy ng Panginoong Hesus sa Mateo 24:21! Ngunit alalahanin natin na bago magsimula ang kakilakilabot na mga pagdurusang iyon ay may dakilang kaganapan muna ang magaganap: maglalahong parang bula ang mga totoong kristiyano! Dadagitin ng Panginoong Hesus sapagkat hindi nakatakda sa kaparusahan ang mga tunay na banal na labis na nagmamahal sa Panginoong Hesus!(1Tesalonica5:9)
Napakalapit na mga kapatid....
NAPAKALAPIT NA!

Kapinsalaan sa mga Hindi Nag-aabang Part2

    

   Katibayan ng matagumpay na pamumuhay-espirituwal ng bawat mananampalataya ay ang pananatili sa maka-Diyos na kagalakan. Ito ang dapat asahan sa totoong kristiyano at ito rin ang mahigpit na panawagan ng Diyos sa Kanyang bayan. (Filipos 4:4, I Tesalonica 5:16). 

     Ang pananatili sa kagalakan ang inaasahan ng Diyos sa kanyang mga nasasakupan sapagkat naibigay na sa kanila ang karapatan, lahat ng kapakinabangan at pinakadakilang dahilan upang magalak lagi- ang Panginoong Hesus at ang handog Niyang kaligtasan!

   Ngunit sa kabila nito bakit hirap makita at madama ang kagalakan sa mga nagsasabing kristiyano? Sapat bang dahilan na napakaraming pagsubok at pag-uusig na dinaranas o kinakapos sa mga pagpapala? Mas madaling makakita ng kristiyanong dumadaing, naghihinagpis, mga naiinis, masungit, aburido, matamlay. 

    Kung meron man ay mga "kristiyanong" tawa ng tawa sa harap ng telebisyon, nangingiti sa harap ng computer o pagpi-facebook. Meron namang kiliting-kiliti habang pinag-uusapan ang tsismis at kasiraan ng iba. Ang masaklap nito ay ang hagalpakan ng mga nagsasabing mga mangangaral sa malaswa at makalamang biruan. Matibay ang paniniwala ko na kapag ang kasiyahan ay hinahanap pa sa mga materyal na bagay at mga aliw na pangsanlibutan ang "kristiyanong" ito ay wala sa tunay na kagalakan. At kapag wala ang makalangit (espirituwal) na kagalakan, ang nagsasabing kristiyano ay nasa kapinsalaan! At ano ang kaugnayan ng kagalakan sa pag-aabang sa pagbabalik ng Panginoong Hesus?
   Mahigpit ang paalala ng Salita ng Diyos sa Awit 37:4- "Sa DIYOS mo hanapin ang kaligayahan..." Sa Diyos lang dapat manggagaling ang lahat ng kasiyahan, kagalakan at KAALIWAN. At kung nakatuon sa Diyos ang pag-aasam natin ng kasiyahan, ang mga pagpapalang mula sa Diyos ay mga palabok na lang at ang pangunahing kaaliwan natin ay ang Panginoong Hesus mismo! At kung si Hesus ang sentro ng ating kasiyahan, mauunawaan natin ang pinakamapalad na pag-asa na tinutukoy sa Tito 2:13- ang pagbabalik ng Panginoong Hesus!
    Kaya't hindi kataka-taka na obligahin ng Diyos na mag-aliwan ang mga magkakapatid sa pananampalataya patungkol sa nalalapit na pagbabalik ng Panginoon.
  "Sa araw na yaon, kasabay ng malakas na utos, ng tinig ng arkanghel, at ang tunog ng trumpeta ng Diyos, bababa ang Panginoon mula sa langit. Bubuhayin muna ang mga namatay na nanalig kay Cristo. Pagkatapos, tayong mga buhay pa ay titipunin Niya sa ulap at isasama sa mga binuhay upang salubungin sa papawirin ang Panginoon. sa gayo'y makakapiling Niya tayo magpakailanman. Kaya nga MAG-ALIWAN kayo sa pamamagitan ng mga aral na ito.".
  Pananagutan pala natin na aliwin ang mga kapatid kay Cristo. Ngunit mahirap maisagawa ito ng sinumang hindi interesado sa pagbabalik ni Hesus sapagkat hindi naman talaga si Hesus ang kasiyahan niya kundi pera o ang mga bagay-bagay sa sanlibutan. Si Hesus ang sentro ng kasiyahan ng mga nag-aabang sa Panginoong Hesus, kaya't sila ang pwedeng magbigay ng kasiyahan sa kapwa kapatid. Hindi mo maaaring ibahagi sa iba ang wala naman saiyo.
  Ipinaunawa ng Bibliya na habang papalapit ang pagbabalik ni Hesus ay magsusulputan ang mga manlilibak, at patuyang magsasabi, "O. asan na 'yang Hesus na sinasabi n'yong babalik? e ba't wala pa?"(2Pedro3:4). Malakas ang paniniwala ko na ang mga manlilibak na ito ay galing sa kalipunan ng mga "kristiyanong" malungkutin, masungit, aburido o yaong mga kiliting-kiliti sa mga tsismis, awiting makamundo, pera at mga kalayawan ng mundo. Sila ay yaong napinsala sa espirituwal sa kawalan ng interes sa pagbabalik ni Hesus.
  Ngunit ang mga masayahing tagasunod ni Hesus ay buong tiyaga at pananabik at nakangiting nag-aabang sa pagbabalik ng kanilang Minamahal. Mahirap tablan ng kapinsalaan ng diablo ang mga nagtataglay ng kagalakang makalangit!

Kapinsalaan sa Mga Hindi Nag-aabang Part 1

    Mahigpit ang paalala ng Panginoong Diyos sa Hosea 4:6, "Napipinsala ang ang Aking bayan sa kakapusan ng kaalaman!" Ang kaalamang tinutukoy dito ang pagpapahalaga sa Diyos at sa Kanyang Salita. Sa kasalukuyang henerasyon ng mga mananampalataya, ano nga ba ang napapanahong paala-ala mula sa Salita ng Diyos na maituturing na napakahalagang kaalaman na dapat pag-ukulan ng pansin ng mga nagsasabing kristiyano upang huwag siyang mapipinsala? Ayon sa aking pagsasaliksik at pag-arok sa kalooban ng Diyos, ito ay walang iba kundi ang pag-aabang sa muling pagbabalik ng Panginoong Hesus. Napakaseryoso ng paalala ng Panginoong Hesus, pansamantalang inilingid ang eksaktong oras ng Kanyang pagbabalik kaya't mahigpit Siyang nagbabala: "Maging handa kayo lagi!", "Kaya magbantay kayo, sapagkat hindi ninyo alam ang araw ni ang oras!" (Mateo24:44; Mateo 25:13; Marcos 13:35; Marcos13:37; Lucas 21:36) Samakatuwid, sinumang nag-aakalang kristiyano ngunit binabalewala ang kaalaman patungkol sa paghahanda sa muling pagbabalik ng Panginoon ay nalalagay sa panganib ng kapinsalaan!

    Nandito ang ilang nasaksihan kong kapinsalaan na karaniwang dinanas ng mga mananampalataya. Ang mga mananampalatayang ito ay talagang aktibo sa ministeryo. Wala silang palya sa pagdalo ng mga gawain at hayagan din namang ipinangangalandakan na sila ay mga tagasunod ni Hesus. Ngunit sa kabila nito, ay ganito ang mga dinanas nila: nawasak ang tahanan, nagkahiwalay silang mag-asawa; hindi na makaahon sa hirap at kagipitan; pagkaubos ng salapi sa karamdaman at pagkaka-ospital; ang mga anak ay napariwara (nalulong sa mga bisyo at nagdalang-tao ng walang matrimonya); dumanas ng matitinding dagok sa buhay, at ang masaklap, may mga kapamilya na binawian ng buhay na hindi man lang nakakilala sa Panginoong Hesus o nakatanggap ng kaligtasan!    

   Ano ang pagkakapareho ng mga dumanas ng ganito? Sila'y pawang hindi intersado sa muling pagbabalik ni Hesus! Naisantabi nila ang mahalagang kaalaman na maging handa lagi! E, ano naman ang koneksyon nito sa pag-aabang sa muling pagbabalik ni Hesus? Ang ibig ba nitong sabihin kapag nag-aabang sa pagbabalik ni Hesus, hindi mawawasak ang kanilang tahanan? Hindi mapapariwara ang kanyang mga anak? Hindi siya mamamatayan ng kapamilya na hindi nakapagsisi? Dumadagundong na "OO" ang sagot ko! Bakit? Ang mga totoong naghihintay kay Hesus ay totoo at seryosong mananalanginin!(Lucas 21:36) Sumasamo sa Diyos araw at gabi. (Lucas 18:7-8). 

     Hindi lamang na matiyaga at masigasig sila sa pananalangin, kundi minamaramapat pa nila ang ang kanilang mga sarili sa pamantayan ng Diyos sapagkat ang mga totoong nag-aabang sa muling pagbabalik ni Hesus ay nagpapakabanal o nagpapakalinis! (1Juan3:3, 1 Tesalonica 5:23) 

    Mahirap tablan ng mga perwisyo at kapinsalaan ng diablo ang mga totoong naghihintay sa pagbabalik ni Hesus sapagkat buhay na nila ang manalangin (pananatili sa presensiya ng Diyos) at walang maisusumbat sa kanila ang kaaway sapagkat taglay nila ang katuwiran ni Hesus. Kayang durugin ang mga kapinsalaan ng kaaway ng seryosong panalangin ng mga banal sapagkat mabisa at makapangyarihan ang panalangin ng mga taong matuwid! (Santiago 5:16). At ang mga matuwid na ito ay ang mga totoong nananabik sa muling pagbabalik ng Panginoong Hesus!

Kagilagilas ng mga Tanda sa Kalangitan

     Patuloy na pinagtitibay ng maraming kaganapan sa kasalukuyan na talagang maikli na lang ang panahon at ang inaabangan ng mga TOTOONG KRISTIYANO na pangakong pagdating ng Panginoong Hesus ay magaganap na nga. Lahat ng naitala sa Bibliya ay halos nagaganap ng lahat.

   May binanggit ang Panginoong Hesus sa Lucas 21:28- "Kapag nakita ninyo na nagaganap na ang mga ito, tumindig kayo at tumingala sa itaas sapagkat ang kaganapan ng pagliligtas (rapture/pagdagit) sa inyo ay napakalapit na." 

   Ang espirituwal at malalim na pakahulugan ng sinabing ito ng Panginoon ay ganito: kapag nandiyan na ang mga palatandaan ng pagbabalik ni Hesus, ang mga mananampalataya ay dapat na manindigan o maging matatag na iukol ang pansin, atensiyon at pagpapahalaga sa mga bagay na makalangit o espirituwal. Kinakailangan mapaglabanan ang matitinding pang-akit at isyu ng sanlibutan. Habang papalapit ang pagbabalik ng Panginoon ang diablo naman ay gagawa ng lahat ng pamamaraan upang agawin ang atensiyon ng mga mananampalataya papalayo sa Diyos at sa Kanyang pamantayan. Sa tindi ng ginagawa ng demonyo, minsan, hindi namamalayan ng mga hinirang na impluwensiyado na pala siya ng kalakaran, sistema o galaw ng mga walang Diyos! Kaya nga mahigpit ang paalala ng Salita ng Diyos sa Colosas 3:2, "Ituon ninyo ang inyong mga paningin sa mga bagay na panlangit, hindi sa mga panlupa o pangsanlibutan!" Ngunit nakita ko rin sa talatang ito na may literal din na nais iparating ang Panginoong Hesus. Nais din Niyang tumingala ang mga kristiyano, tumingin sa kalangitan at obserbahan ang mga magaganap sa araw, buwan at mga bituin upang abangan ang mga kaganapan ng inihayag mismo ni Hesus sa Lucas11:21, mga tanda sa kalangitan/himpapawid at sa Lucas 21:25, mga tanda sa araw, buwan at mga bituin.

  Sa iba't-ibang panahon, at panig ng mundo, napakaraming naibalita na pambihirang naipamalas ng araw, buwan at mga bituin na dati-rati ay hindi naman karaniwang ganun. Iba-'t ibang "phenomena" na talagang tumawag sa atensiyon ng maraming nag-oobserba katulad ng mga ito:

   Kamakailan, Mayo 24, 2014, bandang alas-10 ng umaga, habang ako ay nasa lalawigan ng Sorsogon ang tanawing ito ng araw ay nagbigay ng kilabot sa aking katauhan. Sa buong buhay ko ay talagang ito ang una kong nasaksihan. Namamangha ako sa tuwing nakikita ko ang araw na parang dugo ang kulay, ngunit ang larawang ito ng araw ay talagang pambihira! 

   Tunay na napakalapit na ng pagbabalik ng Panginoong Hesus! Naniniwala akong marami pang katulad nito ang masasaksihan sa iba't ibang panig ng mundo bilang pagtitibay na TOTOO TALAGA ANG BAWAT NAITALA SA BIBLIYA at 
TOTOONG NAPAKALAPIT NA NG PAGBABALIK NG PANGINOONG HESUS!

Kailan Maglalagayan ng Tatak?

      

    Maraming kaganapan o nangyayari sa kasalukuyan ang una nang inihayag ng Bibliya bago pa dumaan ang daan-daang taon. Ang pag-alagwa ng karunungan ng tao upang makalikha ng imbensiyon at teknolohiya lalo na sa larangan ng kompyuter ay una nang inihayag ng Daniel 12:4. Isa pang tiyak na mangyayari (sapagkat ito ay ipinauna na ng Bibliya) ay ang panahon na lahat ng tao na gustong magnegosyo, magbenta/bumili at lahat ng usapin na may kinalaman sa pananalapi ay dapat magkaroon muna ng tatak upang sila ay makapagpatuloy sa kanilang transaksiyon. Ayon sa Pahayag 13:16-17,

  "Sapilitang pinatatakan ng halimaw, sa kanang kamay o noo, ang lahat ng tao-dakila at aba, mayaman at mahirap, alipin at malaya. At walang maaring magbenta o bumili maliban na may tatak ng pangalan ng halimaw o ng bilang na katumbas niyon."

   Gaano na nga tayo kalayo o kalapit sa nasabing magaganap na kondisyon ng lipunan? Suriin natin ang isang proseso na matagal nang nagaganap lalo na sa karamihan ng mga progresibong bansa. Karaniwan sa mga mamamayan ng mayayamang bansa ay namimili, namamasyal at gumagawa ng mga transaksiyon nang halos wala nang dalang pera. Bakit? 

 Sapagkat ang pera nila ay nakarekord na lang sa isang tarheta(kard) na binabasa ng isang kompyuter gadget. Ang card na ito ay nababawasan o nadadagdagan depende sa transaksiyon nila sa banko. Halos ito ay nasusubukan na rin natin dito sa Pilipinas.

   Sinuman ay pwede nang sumakay ng tren kahit walang pera basta meron lang Lrt card na mabibili sa halagang isandaan at magagamit na  sa 7 biyahe ng tren. Ang card na isinuksuk sa entance ng tren upang makapasok ay siyempre may tatak! 

       

     Sa katunayan, ang Pilipinas ay nahuhuli na sa modernisasyon sa aspetong ito ng teknolohiya kung kaya laman na ng mga balita ang pag-aagawan ng 2 dambuhalang negosyante (AF Consortium at SM Consortium) patungkol sa tinatawag na Single Ticketing. Ang makakakuha ng kontrata ang siyang mamahala sa pagbebenta ng LRT card. Bakit sila nagkakadarapa sa kontratang ito? Ang dahilan ay sapagkat hindi lang entrance card ng tren ang sasakupin nito, pati na rin ang mga card sa mga bagong ilalabas ng modernong bus, sa mga transaksiyon sa mga mall, grocery at department store. 

     Higit sa lahat, ikokober na rin nito ang mga ATM transaksiyon sa bangko. Ang katumbas nito ay ang Octopus card na matagal ng ginagamit sa ibang bansa, katulad ng Singapore. Ano pa ang kakaiba sa card na ito. Lantarang inihahayag sa mga balita na ang card na ito ay nagtataglay ng RFID!

  Ano ang RFID? Ang RFID ay pinaikling tawag sa Radio Frequency Identification. Ano ito at ano ang kinalaman nito sa pagtatak? Ang gamit nito ay katulad ng "barcode"!  Nalalaman ng mga teller sa mga grocery at department store ang halaga ng paninda kapag itinatapat nila ang gadget(scanner) sa barcode. Ngunit ito ay higit pa sa barcode, meron na itong sangkap na teknolohiya (na matatagpuan sa mga radyo at telepono), ang transceiver at antena kung saan ito ay nakakatanggap at nagpapadala ng mga impormasyon kahit pa ang computer gadget (scanner) ay nasa layong 30 metro. Ito ang malinaw na nagaganap ngayon, lahat ng card na may kinalaman sa pananalapi ay pag-iisahin upang magkaroon ng modernong card na may RFID. 

     

    Kapag ang Pilipinas ay sumasabay na sa Octopus card ng ibang bansa ito ay kaagad na magkakaroon ng ng mga dagliang pagbabago na sasang-ayon sa programa ng isang lihim ngunit makapangyarihang samahan na siyang may-akda ng lahat ng ito upang kontrolin at pag-isahin ang lahat ng tao upang tatanggapin at kilanlin ang isang personalidad na inihahayag ng Bibliya-ang Antikristo!

    Tingnan natin ang prosesong mangyayari....

     Ang Global Access card ay hindi rin mananatili sapagkat lilitaw agad na may mas mainam pa kaysa dito. Kapamaraanang hindi mawawala, mananakaw o mapepeke.

Napakahalagang panawagan:

Tanggapin ang totoong HESUS, ang Anak ng Diyos na nabayubay sa krus ng kalbaryo upang akuin ang kasalanan ng sangkatauhan sa ating mga puso sa pamamagitan ng seryosong pananampalataya na nilakipan ng tunay na pagsisisi at pagtalikod sa kasalanan. Pakatiyakin natin na talagang konektado tayo sa Kanya at SIYA na ang lahat-lahat sa ating mga buhay at ito ay pinagtitibay ng BANAL NA ESPIRITU na taglay ng mga totoong pinatawad at iniligtas.

Kapag Sinasabi ng Mga Tao-"Kapayapaan at katiwasayan!"...(1Tesalonica5:3)

    

     Ang mga huling araw ay mapupuno ng mga isyu patungkol sa kapayapaan, o kapanatagan at mga panawagan ng pagkakaisa. May dalawang anggulo ang isyu ng kapayapaan. Unang anggulo ay kapag nahaharap sa mga problema at banta ng mga panganib ang mamamayan at tungkulin ng mga nasa pamahalaan o pamunuan ang magpalaganap ng impormasyon na walang dapat ipag-alala ang mga tao. Lalabas nga namang walang silbi ang mga nasa maykapangyarihan kung hahayaang nagpapanik ang mga tao o tuliro na sa kawalan ng seguridad. Pangalawang anggulo ay ang panawagan ng pagkakaisa. Mababatbat ng paglalaban-laban ang mga huling panahon, maraming sigalutan at di-pagkakaunawaan ang magaganap sa iba't ibang sangay at larangan ng lipunan. Sinabi nga ng Bibliya na maglalaban-laban ang mga bansa, lahi at pamunuan. (Mateo 24:7). Habang nagaganap ito, ay marami pa ring magpupursige na ipangalandakan ang "kapayapaan'! Kung kaya ang mga balita at panawagan patungkol sa kapayapaan ay magiging palasak(karaniwan) habang nalalapit na ang pagbabalik ng Panginoong Hesus.

   Inihayag ng Bibliya na nakatakdang lumitaw ang isang makapangyarihang personalidad na maituturing na "Ginoo ng Kapayapaan" (man of peace). Ang mga nagaganap sa kasalukuyan na mga kahirapan, problema, banta ng mga krisis at panganib, paglalaban-laban/hindi pagkakaunawaan, pag-aangkin ng mga teritoryo at marami pang hamon sa lipunan ay paglalagay sa isang malawakang kondisyon na ang lahat ng nasa sanlibutan ay totoong nangangailangan na ng pandaigdigang bayani. Hindi nakapagtataka na ang mga tao ay nananabik at hindi magkamayaw sa ekspektasyon kapag may nailuluklok na bagong pangulo o pinuno. Naalala nyo ang reaksiyon ng mga kano ng mailuklok si Obama? Marami rin ang natuwa ng mahalal ang Pangulong Noynoy.

    

    Ang pangangailangan ng magaling na lider pangkapayapaan ay matutugunan  sa katauhan ng malapit ng lumitaw na "Ginoo ng Kapayapaan", walang iba kundi ang anti-kristo. Ipapakilala niya na siya ang solusyon sa lahat ng problemang pandaigdigan at bilang instrumento ng pagkakasundo ay pagkakaisahin niya ang lahat ng bansa.(Daniel 11:23 at Pahayag 17:17). 

    Inihayag na ng Bibliya- ang tiyak na mangyayari sa mga susunod na araw: yayakapin ng maraming tao ang inaalok na kapayapaan ng Anti-kristo! Ito ay mangangahulugan ng tiyak na kapahamakan. Ngunit ang eksaktong pakahulugan ng 1Tesalonica5:3 ay sa ganito ipinauunawa- mababatbat ng isyung pangkapayapaan ang mga huling panahon kaya't ito ay nangangahulugan na napakalapit na ng pagbabalik ng Panginoong Hesus. Ang katumbas ng pagbabalik ng Panginoon sa mga hindi nagsipaghanda ay kapahamakan. Kapahamakan sa mga hindi nagsipagsisi o naglinis ng kanilang kalagayan sa paningin at pamantayan ng Diyos. Kapahamakan ang katumbas ng pagbabalik ng Panginoon sapagkat ito ay katapusan o ultimatum na sa pagkakataong maligtas ang mga mga tao. Kapag dumating na ang Panginoong Hesus, at lihim na sinundo (mahiwagang maglalaho) ang mga banal(totoong born-again christian), wala ng pag-asa pang mapunta ng langit ang mga hentil (hindi hudyo) na naiwan (Mat25:11, Mateo24:39-42, Pahayag3:16), maliban na lamang sa mga Hudyo. Kung susuriin sa diwa ng Bibliya ang kasalukuyang pandaigdigang sitwasyon, hindi maipagkakamali na nakakondisyon na ang lahat sa pagtanggap sa paparating na "pandaigdigang bayani"/"ginoo ng kapayapaan" o ang Anti-kristo.

  Ngunit bago siya malantad sa lahat ay palihim munang darating ang Prinsipe ng Kapayapaan, (Isaiah9:6), ang Panginoong Hesus, upang iadya sa malupit na kamay ng Anti-kristo (sa una lang siya magiging mabait, ngunit lilitaw ang totoong kulay niya matapos ang tatlo at kalahating taon)!

     Nasa iyo na ba ang Prinsipe ng Kapayapaan? Natanggap mo na ba Siya sa iyong puso at may tiyak na kaugnayan sa Kanya? Naisuko mo na ba ang iyong buhay sa Kanya? Naunawaan mo na ba ang dakilang kapakinabangang ginawa Niya sa krus ng kalbaryo? Nagpakababa ka na ba sa Kanya at humingi ng kapatawaran sa lahat mong kasalanan? Kapag "oo" ang sagot mo, taglay mo na ang kapayapaang walang kapantay! 

  Walang ibang maaaring magkaloob ng totoong kapayapaan at KALIGTASAN kundi ang Anak ng Diyos lamang, ang

Panginoong Hesus!